Oleh: Aris Arianto
Zona Sulawesi – Topenye Sorisit. Marajina mondulu tosia’angonye monimbalas li jo’ong sakulati. Seseleo Sorisit kana jo’ongoma’.
Ame biasanye, uleng masambate, Sorisit ma’ome jo’onge. Patujunye molamunge li pipite punu sakulati. Laupe noduae li jo’onge, bai noga senga nepese ompongonye. Penosaba’onya injo’a Sorisit laume natarusa jo’ongama’e. Sinendera’e li punu lemo, neiyasoma lakuni Sorisit. Paila’e pinosenderangnye mense’e la’e jo’ongi Kumpolo.
“Onoga oe Sorisit? Neiyasome lakume,” noutanya Kumpolo.
“Keh, bainoga’e dah! Bai totouanga nepesa ompongo’e.” Sorisit binongkilut monyabar pesonye.
“Bah, biasanya nasala inanga alaeme.”
“Sala inange gauga? Bi so punju’a anionge ninango’e paneane,” nongimbata Sorisit.
“Njo ai’a kana inononya oe,” nokapangai Kumpolo.
“Nononu doti, kapangome?”
“Ta injo’umeo! Laume nasalanye.”
“Turuni maipo, Kumpolo!”
“Njo aioa, sulauboma ite!”
Sorisit nomaksa meolo. Sulaubi Kumpolo li alungu jo’ongonye. Pesu ompongonye pinonyabarangonye ngkai soboa lemo nokukunduinye.
“Pongkelungopa, ba masananga penyange,” nomelu Kumpolo. Sorisit nonuru. Tetimolosoma, pesu ompongonye nepailaomaim. Sinu subanu bayale, Sorisit nete otulu.
Sorosit netetaingking. Wungalaga magaya dudungko li pipitu koi. Nopolimima, memise ame rasanu gula tapo. Jopa magaya laku. Nyame nopelu ungkulu batanganonye. Memease ame kasubinge nulisange.
“Nugaungoma nepese, Sorisit?” Wungalaga noutanya. Neheranoma Sorisit. Teutanya lalongu nya, onoga notoinya tope’e?
“Ompongo’a meepese, Udo,” leleni Sorisit.
“Lelea kabayame!”
“Inya Udo, mesili uepe.” Sorisit netaingking.
“Nuga esilia’ome! Lia’e bi monyanyaupe ompongome!”
“Inya, udo! Mongi yampuneeee!”
Wungalaga bi maalese. Jelaume pinadulinya oi Sorisit meloloa momongiyampune. Nulimanye uma-anima monggagape ompongi Sorisit.
“Laume, Udoooo! Mongiampuneeeee!” loloani Sorisit.
Puk puk puk! Tolu insang heputo telembase li ba’i ni Sorisit.
“Sorisit! Sorisit! Pembaungome!” neloloa Kumpolo.
Sorisit senga nembaung, nongarumpa. Initonyama heputo li lima ni Kumpolo. Sorisit bi nongoyose matanye. Tantu binongupi.
Tama’
Baca juga : NOLAPI PONTIANA MAGAYA
